Кандидатот на ВМРО-ДПМНЕ за градоначалник на Битола, Тони Коњановски, изјави дека проектот за топлификација е во завршна фаза и ќе овозможи 36 јавни институции да престанат со користење на цврсто гориво, што ќе придонесе за значително намалување на загадувањето во градот.
„Делот на топлификацијата, кој е во завршна фаза, ќе овозможи 36 јавни институции да се ослободат од тврдото гориво. За пречистителната станица во тек се подготвителните работи на терен. Тоа се два проекти на ВМРО-ДПМНЕ кои го решаваат загадувањето,“ изјави Коњановски во гостување на ТВ24.
Тој додаде дека е изработен зелен катастар и обемна програма за енергетска ефикасност, како дел од визијата за зелена и одржлива Битола.
Коњановски потсети и на инфраструктурните проекти реализирани во изминатите четири години, посочувајќи дека во тој период се реконструирани улици во должина од над 50 километри.
„Во наредниот мандат ќе се продолжи со истиот интензитет. Направивме комплетна реконструкција на улици во должина од над 50 километри и се зафативме со два капитални проекти – новиот влез во Битола и проектот од страната на Охрид,“ нагласи Коњановски.
Тој истакна дека донесувањето на новиот Генерален урбанистички план, започнат во неговиот мандат, претставува основа за решавање на клучните инфраструктурни и еколошки предизвици на Битола.
