Вицепремиерот и министер за транспорт и врски, Александар Николоски, изјави дека по локалните избори нема да се одржат предвремени парламентарни избори, истакнувајќи дека Владата е стабилна и ќе го реализира целиот мандат до 2028 година.
„Предвремени избори ќе нема, имаме стабилна коалициска влада која функционира одлично,“ изјави Николоски при посетата на Гостивар во рамките на кампањата за локалните избори.
Тој нагласи дека приоритет по завршување на изборите ќе биде расчистувањето во судството и обвинителството, како и, како што рече, „одговорност од сите кои ја злоупотребиле власта од т.н. црна коалиција на СДСМ, ДУИ и Левица.“
„Разликата помеѓу нас и нив е што ние зборуваме за проекти — не можеме ни да ги наброиме колку се, додека од другата страна има само празни зборови и постојана желба за власт. Минатата година отидоа во опозиција, а сега, по само една година и три месеци, не можат да издржат и постојано бараат предвремени избори. Тоа покажува дека ги интересираат само привилегиите и криминалот од власта,“ изјави Николоски.
Тој дополни дека Владата нема намера да се занимава со политички калкулации, туку со конкретни реформи во правосудниот систем. „Тоа е фокус број еден по завршување на изборите,“ порача Николоски.
