Кандидатот за градоначалник на Град Скопје од ВМРО-ДПМНЕ, Орце Ѓорѓиевски, денеска се сретна со угостителите од општина Карпош, заедно со кандидатот за градоначалник на општината, Сотир Лукровски.
На средбата се разговараше за проблемите и можностите на угостителскиот сектор, кој, како што истакна Ѓорѓиевски, претставува „мотор на градската економија и дел од пулсот на Скопје“.
„Секоја идна одлука ќе биде резултат на дијалог, разбирање и интерес за сите страни. Нашиот град заслужува повеќе енергија, младост и креативност, а тоа е можно само со поддршка на угостителите“, изјави Ѓорѓиевски.
Тој најави дека во рамки на неговиот кабинет во Град Скопје ќе биде назначен специјален советник за угостителство, кој ќе биде избран од редовите на самите угостители. Целта е да се создаде директна комуникација и партнерски однос меѓу градската администрација и угостителскиот сектор.
„Заедно ќе градиме политики и решенија за подобар ноќен живот и посилна угостителска сцена“, порача Ѓорѓиевски, изразувајќи благодарност за поддршката и конструктивниот дијалог на средбата.
