Портпаролот на Локалниот штаб на Вреди во Чаир, Сабри Азири, на денешната прес-конференција пред гинеколошката болница „Мајка Тереза“ остро го обвини поранешниот министер и кандидат Бујар Османи за корупциски скандал во вредност над 21 милион денари.
Според Азири, проектот за реконструкција на болницата наместо да донесе подобри здравствени услуги за граѓаните на Чаир, се претворил во симбол на злоупотреби. „Наместо чаирани да добијат современа гинеколошка болница, тие добија уште еден симбол на корупцијата“, истакна тој.
Азири додаде дека во кариерата на Османи, која трае повеќе од десет години, резултатите за Чаир се речиси непостоечки. „Бугар Османи на државни функции поминал 3.672 дена – но ниту еден ден посветен на Чаир“, посочи Азири, додавајќи дека освен службени средби со странски делегации, чаирани добиле само празни ветувања.
Портпаролот постави дилема дали Османи некогаш делувал во интерес на граѓаните без лична корист. „Само од овој проект логично се наметнува прашањето – дали Османи прави било што без личен ќар за себе или за најблиските?“
Азири заврши со порака до жителите на Чаир: „На 19 октомври, Бујар Османи ќе биде пациентот на гласачите, кои масовно ќе му ја отворат излезната врата од политиката.“
