Кандидатот за градоначалник на Град Скопје, Орце Ѓорѓиевски, вечерва се сретна со жителите на Чаир, каде што ја презентираше својата визија за развој на главниот град.
„Вечерва сум меѓу моите чаирчани, вистински домаќини кои сакаат и заслужуваат подобар живот во Скопје. Им ја претставив мојата визија за Скопје која не ги игнорира проблемите, туку храбро се соочува со нив. Проблемите се големи, но решенија постојат и ние ги имаме“, истакна Ѓорѓиевски.
Тој се заблагодари за топлиот прием и искрената поддршка, нагласувајќи дека секоја стисната рака му дава дополнителна мотивација. „Ви ветувам дека ќе работиме посветено и деноноќно, без изговори, за Скопје повторно да стане достоинствено место за живеење,“ додаде тој.
Ѓорѓиевски посочи дека Чаир во минатите години бил запоставен и заборавен, но во неговиот мандат тоа ќе се промени. „Подавам рака на сите, затоа што Скопје е наш заеднички дом. Заедно ќе го изградиме градот каков што навистина го заслужуваме,“ порача кандидатот.
Настанот заврши со пораката дека „најдоброто допрва доаѓа“ и дека граѓаните на Скопје ќе имаат можност да изберат визија која ставa човекот на прво место.
