Обновата е наш завет наша мисија. Заедно можеме со чесност и одговорност да обезбедиме сигурна иднина за нашите сограѓани. Не верувајте во празни цзборови, верувајте во дела. Ние ќе покажеме како чесно и одговорно се работи бидејќи имаме сила и визија за нови промени. Нашата програма не е само лист хартија и празно ветување. Тоа се реални проекти за подобар живот на прилепчани, посочи Дејан Проданоски, кандидат за градоначалник на Прилеп од редовите на ВМРО-ДПМНЕ.
-Еден од најголемите приоритети претставува изградбата на обиколниците ,,Исток“ и ,,Запад“ современи сообраќајни решенија кои ќе ја променат иднината на Прилеп. Обиколницата „Исток“ во должина од 1,6 километри, и профил оф 5,5 метри ќе биде директна артерија што ќе ги насочи тешките товарни возила, надвор од срцето на градот. Таа ќе се протега од стариот пат кон вештачкото езеро, преку склештен мост се до клучката за новиот автопат. Со тоа ќе се растовари центарот, ќе се намали метежот и загадувањето, а прилепчани ќе добијат почист воздух и мирен сообраќај низ централното градско подрачје. Обиколницата ,,Запад“ е огромен капитален проект, долга 4,5 километри со модерен профил од 26 метри кој ќе опфати коловозни ленти, велосипедски и пешачки патеки. Новата траса ќе ја поврзе делницата од Мебел Венеција преку Варош па се до фабриката за Мермер на улица ,,Леце Котески“ и натаму до ,,Црн Бор“. На оваа траса ќе изградиме два надвозници и еден мост овозможувајќи безбеден брз и европски сообраќај за нашиот град. Со реализација на овие два проекти, ќе се реши еден од најголемите проблеми на Прилеп, сообраќајниот хаос во центарот. Но уште поважно, ќе се создатат нови можности за економски развој, бизнисот ќе добие полесен пристап до автопатот што значи нови инвестиции и отворање на нови работни места, рече тој.
Проданоски посочи дека сообраќајот е движечка сила на економијата, на кој му дава модерен и функционален облик.
-Растоварувањето на срцето на градот, е вистински избор за современ европски и успешен Прилеп. Нашата визија и цел се јасни, со посветеност чесност и трудољубивост продолжуваме по патот на развојот. Прилеп го заслужува тоа, направете го вистинскиот избор, за твојот човек, за твоето место, за твојата иднина, рече тој.
Извор: kurir.mk
