Кандидатот за градоначалник на Скопје од ВМРО-ДПМНЕ, Орце Ѓорѓиевски, на првиот ден од кампањата за локалните избори ги претстави седумте столбови на својата програма, кои ги нарече темели за иднината на градот.
Првиот столб е одржлив урбан развој, со 20-годишна визија „Скопје 2025–2045“, ново јавно претпријатие „Урбан Центар Скопје“ и враќање на функцијата Градски архитект.
Вториот столб е здрава животна средина, со почеток на акцијата „Генералка на градот Скопје“ и програма „Град без депонии“, изградба на четири мега-паркови и најмалку 50 маалски зелени површини.
Третиот столб се однесува на целосна комунална и сообраќајна обнова, со завршување на запрените проекти, изградба на нови булевари, катни гаражи и систем за атмосферска и фекална канализација.
Четвртиот столб е култура, со цел Скопје да стане Европска престолнина на културата во 2028 година, обновување на Универзалната сала и киното „Милениум“, како и оживување на Калето, Аквадуктот и Скупи.
Петтиот столб е дигитална трансформација, со воведување на „SKOPJE CITY GO“ и „Градски портал“ за брзи, транспарентни и ефикасни услуги за граѓаните.
Шестиот столб е младите и науката, со поддршка за младите брачни парови, модерни училишни објекти и програми за здравје и психолошка поддршка на учениците.
Седмиот столб е јавната грижа и безбедноста, со нови еколошки автобуси, градски воз, велосипедски патеки, пешачки коридори и модернизација на противпожарната служба, како и грижа за пензионерите, болните и лицата со попреченост.
Ѓорѓиевски потенцира дека секој од овие столбови е дел од стратегија за модерно, функционално и безбедно Скопје кое ќе служи за сите граѓани.
