Кандидатот за градоначалник на општина Чаир, Изет Меџити, на денешното обраќање до граѓаните истакна дека Чаир заслужува брз и правичен развој, институции кои им служат на граѓаните и лидерство со визија, храброст и чесност.
„Јас сум овде како син на овој крај, како пријател и сосед. Не сум овде заради позиции и привилегии, туку за многу поголема мисија – да го подигнеме Чаир на нивото што го заслужува, како пример за еднаквост, правда и развој за сите“, рече Меџити.
Тој нагласи дека Чаир ќе биде пример за победа над корупцијата и неправдата, место каде што инвестициите нема да бидат блокирани од интереси на кланови, каде што училиштата ќе се модернизираат, населбите ќе добијат светлина, младите ќе имаат перспектива, а постарите ќе се третираат со достоинство.
„Ова е наша заедничка борба. Заедно ќе го направиме Чаир гордост на Албанците и пример на администрација која работи за луѓето. Не ветувам чуда, ветувам дека ќе бидам покрај вас на секое место каде што е потребна правда и работа“, додаде Меџити.
Тој ги повика граѓаните да се вклучат во изборниот процес и нагласи дека 19 октомври е денот кога Чаир повторно ќе победи.
