Кандидатот за градоначалник на општина Прилеп, Дејан Продановски, им се обрати на граѓаните со порака дека неговата кандидатура не е заради чест или титула, туку заради иднината на градот и неговите жители.
„Прилеп е мојот град. Тука сум пораснал, тука живеам, тука сакам да ја гледам иднината на моите деца и на сите наши деца. Тоа е мојата најголема причина да застанам пред вас“, истакна Продановски.
Тој порача дека да се биде градоначалник не значи само канцелариска работа, туку обврска секојдневно да се слушаат луѓето, да се чувствуваат нивните проблеми и да се бараат решенија со чесна работа.
„Тоа е обврска да обезбедиш чиста улица, осветлена патека, уредено маало и живот достоен за секој човек, во секој дел од нашиот град и населените места околу него“, рече Продановски.
Во своето обраќање тој подвлече дека Прилеп заслужува повеќе – нова енергија, поубави населби, нови работни места и можност младите да ја градат својата иднина во родниот град.
„Јас верувам во тоа и верувам во вас. Ако застанеме заедно, можеме да ја претвориме надежта во реалност. Со вашата доверба, ќе работам со цело срце и со цела сила. Знам дека Прилеп може подобро. И знам дека заедно ќе го направиме тоа“, порача Продановски.
