Градоначалникот на Општина Кисела Вода и кандидат за град Скопје, Орце Ѓорѓиевски, денеска присуствуваше на женската лидерска конференција „Јас сум жена“, посветена на улогата, визијата и храброста на жените во општеството.
„Длабоко верувам дека жените се двигателот на нашето општество. Без мајката, сопругата, сестрата, без секоја жена која со љубов го вложува срцето во сè што прави, нема иднина,“ изјави Ѓорѓиевски.
Тој нагласи дека е горд што во неговиот тим во Општина Кисела Вода доминираат жени, додавајќи дека и во Град Скопје ќе бидат вистински партнер на жените во нивните иницијативи и визии.
„Ќе бидам сојузник на секоја жена што се бори за себе, за своето семејство и за својата заедница. Тоа е должност која ја чувствувам со срце,“ порача тој.
Ѓорѓиевски ја истакна својата поддршка за економско јакнење на жените, за нивната заштита и рамноправност во сите сфери од животот.
