Учениците од ОУ „Елпида Караманди“ денеска ја претставија својата креативна акција во Зоолошката градина во Битола, каде што изработија шарен и инспиративен мурал, посветен на љубовта кон природата и животните.
Градоначалникот Тони Коњановски, заедно со директорката на училиштето, наставниот кадар и директорот на Зоолошката градина, присуствуваа на промоцијата на уметничкото катче создадено од младите битолчани. Муралот, подготвен под водство на наставничката по ликовно образование, беше збогатен со обоени отисоци од рацете на учениците и присутните, како симбол на заедништво, грижа и љубов кон животната средина.
За време на посетата, претставниците на локалната самоуправа разговараа со раководството на Зоолошката градина за тековните активности и идните планови за развој. Коњановски најави два значајни проекти кои ќе се реализираат со поддршка од Унгарскиот кредит преку Владата на Република Македонија: изградба на ново живеалиште за копитари во вредност од 9.634.336 денари и изградба на современ терариум во вредност од 8.994.667 денари.
„Со овие инвестиции, Општина Битола вложува во подобрување на условите во Зоолошката градина, создавање современ простор за животните и овозможување на поквалитетно, едукативно и забавно искуство за сите посетители“, изјави градоначалникот Коњановски.
Зоолошката градина во Битола останува едно од најпосетуваните места во градот, а со новите содржини ќе добие уште поголема атрактивност и значење за граѓаните и туристите.
