Кандидатот за градоначалник на Град Скопје, Орце Ѓорѓиевски, денеска го стави својот потпис на Кодексот за фер и демократски избори, со што јавно се обврза дека ќе биде гарант на транспарентен, фер и достоен изборен процес.
„Со голема чест и одговорност го ставив својот потпис на Кодексот за фер и демократски избори. Овој потпис е јасна и јавна обврска дека како кандидат за градоначалник ќе обезбедам процес кој ќе биде транспарентен, фер и достоен за доверба“, изјави Ѓорѓиевски.
Тој посочи дека чесноста, непристрасноста и отчетноста се темели врз кои се гради довербата во институциите и во самиот изборен процес. Ѓорѓиевски додаде дека се обврзува да ги почитува демократските принципи, да обезбеди еднакви услови за сите кандидати, како и да не дозволи притисоци, заплашувања или дискриминација.
„Изборите се мерило за зрелоста на нашиот народ. Должност ни е да создадеме атмосфера во која секој ќе може да ја искаже својата волја без страв, со право да учествува, да се информира и да гласа слободно“, рече тој.
Ѓорѓиевски нагласи дека со транспарентност и почит кон секој жител на Скопје може да се изгради посилна и поодговорна локална власт. Во својата изјава, тој упати порака до сите кандидати за заеднички натпревар со идеи и планови за подобро Скопје.
„Подавам рака на секој кандидат, со своите идеи и планови да направиме нешто повеќе за нашето Скопје и скопјани, бидејќи тие заслужуваат достоинствен град. Нека победи подобриот“, порача Ѓорѓиевски.
