Со бројни спортски и рекреативни активности од денеска до 30 септември во земјава ќе биде одбележана Европската недела на спортот. Земјава, како дел од европската иницијатива за промоција на спортот и физичката активност – European Week of Sport (EWoS), и оваа година активно ќе учествува во имплементација на проектот преку низа активности со кои ќе се пренесе пораката за здрав и активен живот.
Отворањето на настанот е денеска во 17 часот во ОУ „Кочо Рацин во Скопје“. Првиот дел од програмата ќе биде одбележан со атлетски трки за сите возрасти, велосипедски трки, тимски спортови и игри, забавна програма, фитнес и рекреативни работилници, активности за деца и семејства.
Вториот настан во рамки на Европската недела на спортот ќе се одржи во петок на Средно Водно и ќе опфати отворени спортски станици со тренинг зона, натпревари во баскет 3х3 и фудбал 3х3 и рекреативно искачување до врвот на Водно.
Активностите ќе бидат заокружени на 27 септември со настанот BeActiv Night на Кеј Македонија во Охрид со натпревари во баскет 3х3, ракомет, пинг-понг и стрелаштво, фитнес и аеробик зона, доделување на награди и прогласување на победниците.
-Оваа година е особено значајна во реализацијата на проектот бидејќи се одбележува една декада од оваа инцијатива на Европската комисија која инспирира илјадници луѓе да бидат активни и да ја почувствуваат енергијата на спортот и на заедништвото, велат од Министерството за спорт.
Европската недела на спортот (EWoS) е иницијатива на Европската комисија со цел да ја поттикне физичката активност, рекреацијата и здравиот начин на живот кај граѓаните од сите возрасти. (МИА)
Извор: kurir.mk
