Според последните податоци од Државната изборна комисија (ДИК), досега се потврдени вкупно 303 кандидатски листи за градоначалници на општините и Градот Скопје, додека за членови на општинските совети и Советот на Град Скопје се потврдени 558 листи, соопшти вечерва прес-службата на ДИК.
Во општините Куманово, Аеродром, Карпош и за Град Скопје, ДИК информира дека продолжува проверката на листите поради отстранување на утврдени неправилности, согласно известувања од општинските изборни комисии. Во тек е процес на корекција на осум листи за градоначалници и 20 листи за членови на советите. Од досега доставените листи, пет за градоначалници се отфрлени – по една за општините Бутел, Центар, Куманово, Аеродром и за Град Скопје.
– По завршување на процесот на потврдување на сите кандидатски листи, ќе следува ждрепка за утврдување на редоследот на кандидатите на единствената листа, закажана за 25 септември 2025 година, соопшти ДИК.
Извор: kurir.mk
