Битола – Изградбата на улицата „Крушевска Република“, долга 490 метри, значително ја подобрува сообраќајната инфраструктура во населбата АРМ. Улицата го поврзува сообраќајот од „Македонска фаланга“ со останатите улици во новата населба, овозможувајќи побрз и пократок пристап до античкиот локалитет Хераклеа и до граничниот премин со Грција.
Градоначалникот на општина Битола, Тони Коњановски, истакна дека со новата улица се растеретува сообраќајот на улицата „Партизанска“, додека од друга страна се подобрува поврзаноста на сите објекти во АРМ.
„Приоритетите на граѓаните се наша основна заложба! Продолжуваме со работа, за Битола каква што ја сакаме“, изјави Коњановски.
Со оваа инвестиција, улицата „Крушевска Република“ станува една од клучните сообраќајни артерии во градот, која ја поддржува урбаната поврзаност и развојот на населбата.
