Маж осомничен за убиството на конзервативниот активист Чарли Кирк е уапсен, а клучна улога во неговото предавање одиграл неговиот татко, објави CNN, повикувајќи се на извори блиски до истрагата.
Според информациите, 22-годишниот Тајлер Робинсон од Јута му признал на својот татко дека тој е одговорен за пукањето. Таткото веднаш ги известил властите, го спречил синот да избега и соработувал со полицијата сè додека не бил извршен официјалниот притвор.
Гувернерот на Јута, Спенсер Кокс, потврди дека осомничениот е Робинсон и нагласи дека токму таткото го препознал својот син на видеата и фотографиите објавени во јавноста.
„Тој одигра клучна улога – не само што го охрабри синот да се предаде, туку и помогна во процесот на апсење“, рече Кокс.
Дополнително, во случајот бил вклучен и свештеник кому таткото се обратил за помош, по што бил воспоставен контакт со органите за спроведување на законот.
Пораки до цимерот откриваат детали
Истрагата открила и клучни докази од комуникацијата на Робинсон со неговиот цимер. Според гувернерот Кокс, осомничениот разменувал пораки преку платформата „Дискорд“ во кои се споменувало складирање на оружје, оставање пушка во грмушка, како и куршуми со гравирање. Во пораките, Робинсон наводно пишувал и дека треба да се пресоблече по нападот.
Цимерот наводно првично мислел дека пораките биле шега, но подоцна ги предал информациите на истражителите.
Политичка позадина
Според членови на семејството, Робинсон во последните години станал поактивен во политичка смисла и имал негативни ставови кон Чарли Кирк и неговите јавни настапи. „Кирк е полн со омраза и шири омраза“, изјавил еден од блиските роднини, според гувернерот Кокс.
Очекувањата се директорот на ФБИ, Кеш Пател, како и претставници на Јута во најскоро време да се обратат со официјални информации за случајот.
Извор: tv21
