Првиот вицепремиер и министер за животна средина и просторно планирање, Изет Меџити, денес се обрати на свеченоста по повод 24 години од потпишувањето на Охридскиот рамковен договор, документот кој во август 2001 година стави крај на вооружениот конфликт и ја отвори патеката кон стабилна и инклузивна иднина за сите граѓани.
Меџити потсети дека месецот август носи силна симболика за државата, бидејќи ги обединува Илинден и Охридскиот договор. „Тие не треба да постојат само во календарот, туку и во нашата колективна свест. Само преку заеднички напори, жртва и дијалог можеме да изградиме функционално, праведно и демократско општество,“ изјави тој.
Тој нагласи дека договорот е визионерски акт и историска обврска за држава во која секој граѓанин е еднаков, претставен и почитуван. „Албанците, Македонците и сите други етнички заедници не се само делови од државата – тие се нејзини соосновачи,“ рече Меџити.
Во пресрет на локалните избори на 19 октомври, тој упати апел за зачувување на довербата, институционалната зрелост и политичката одговорност. „Граѓаните очекуваат работа, а не бучава. Очекуваат решенија, а не оправдувања,“ порача првиот вицепремиер.
Меџити заврши со пораката дека сеќавањето на Охридскиот рамковен договор мора да остане трајна обврска за поправедно, поеднакво и пообединето општество, каде заедничкиот дом – Република Северна Македонија – ќе се штити и унапредува за идните генерации.
