Во општина Кисела Вода денес свечено беше поставена новата биста на народниот херој Цветан Димов, на локација спроти општинскиот објект. Претходното спомен-обележје, кое се наоѓаше во рамките на истоимената урбана заедница, со години беше во лоша состојба поради негрижа и оштетувања.
По барање на жителите, изработена е нова биста, со што, како што истакна градоначалникот Орце Ѓорѓиевски, на херојот му се оддава заслужено признание, а историската меморија добива повидливо и достојно место. „Со новата биста на Цветан Димов соодветно оддаваме почит кон неговата жртва, но и создадовме услови повеќе луѓе, особено младите, да ја запознаат неговата приказна,“ рече Ѓорѓиевски.
Тој додаде дека историјата е најсилна кога е пред очите на граѓаните и дека задачата на општината е да ја зачува и пренесе на идните генерации.
