Првиот вицепремиер и министер за животна средина и просторно планирање, Изет Меџити, учествуваше на панел-дискусија организирана од Медресејата Иса Беу во Скопје, по повод важна законска промена – официјалната интеграција на оваа верска образовна институција во државниот образовен систем.
„Со ова законско решение исправивме една децениска неправда. Учениците од Медресејата Иса Беу конечно добиваат исти права како сите средношколци во јавните училишта“, изјави Меџити.
Тој потенцираше дека новиот закон е целосен, инклузивен и доби поддршка и од Уставниот суд. Преку оваа промена, дипломите на учениците од Медресејата Иса Беу ќе бидат признати и ќе им овозможат пристап до високо образование – како во јавните, така и во приватните универзитети, дома и во странство.
„Ова е значаен чекор во признавањето на улогата на Медресејата Иса Беу, која со децении образува генерации со знаење, вредности и посветеност кон заедницата“, истакна Меџити.
Интеграцијата на Медресејата Иса Беу во државниот систем се оценува како важен придонес кон создавање правично и инклузивно општество, со еднаков пристап до образование за сите ученици, без разлика на нивниот верски или етнички идентитет.
