Кичево конечно ќе добие современа болница, достојна за 21 век, најави денес Беким Сали од коалицијата ВЛЕН. Новиот проект за изградба на регионален здравствен центар, вреден 47,5 милиони евра, е дел од стратегијата за системска реформа на здравството, со поддршка од Министерството за здравство и министерот Азир Алиу.
„Ова не е само градежен објект, туку човечка победа и морален чин кон еден регион што со децении беше запоставен“, рече Сали. Според него, болницата ќе биде изградена од темел, со најсовремена медицинска опрема, безбедна и инспиративна инфраструктура, и ќе стане центар на здравствена грижа за граѓаните од Кичево, Македонски Брод, Пласница, Зајаз, Вранештица и Демир Хисар.
Сали потенцираше дека ова е дел од поширока стратегија за унапредување на здравствената инфраструктура низ целата држава. Во Тетово, Владата веќе инвестира 77,5 милиони евра за изградба на два нови објекти, реновирање на хируршки и интернистички блок, како и за нов Медицински факултет.
„Министерот Азир Алиу ја направи здравствената заштита стратешки приоритет. Тоа не се само ветувања, туку конкретни проекти кои носат реална промена“, рече Сали.
ВЛЕН, според него, гледа на здравството не како на трошок, туку како на национална инвестиција. Со изградбата на новата болница, Кичево за првпат по децении добива здравствена установа која ќе биде синоним за достоинство, квалитет и еднаквост.
