РИО ДЕ ЖАНЕИРО (АА) – Судијата на Врховниот суд на Бразил, Алешандри де Мораис, денес нареди поранешниот претседател Жаир Болсонаро да биде ставен во домашен притвор додека против него се води судски процес поради наводно планирање државен удар, јавува Анадолу.
Одлуката е донесена откако Болсонаро, кој е под истрага за обид за поништување на резултатите од претседателските избори во 2022 година, преку видеопорака се обрати на протестот што во неделата се одржа во Копакабана, Рио де Жанеиро.
Судијата Мораис ја оправда мерката со тоа што Болсонаро ја прекршил забраната за користење социјални мрежи, одредена минатиот месец, кога му беше наредено и да носи електронска алка. Иако видеото го објави неговиот син, сенаторот Флавио Болсонаро, тоа беше повлечено по неколку часа.
Во својата пресуда Мораис оцени дека Болсонаро дејствувал „прикриено“ и покажал „незаконско однесување“.
„Дејствувајќи незаконски, обвинетиот Жаир Месијас Болсонаро им се обрати на демонстрантите… намерно и свесно создавајќи префабрикуван материјал со цел неговите поддржувачи да продолжат да ја уценуваат федералната врховна судска власт и да ја попречуваат правдата“, се наведува во документот.
„Правдата нема да дозволи обвинет да се смета за будала“, додава Мораис.
Во наредбата за домашен притвор е предвидена и забрана за посети, освен за адвокати и други лица овластени од Врховниот суд. Федералната полиција е задолжена да ги одземе сите мобилни телефони на имотот на Болсонаро.
На неделниот протест се собраа илјадници поддржувачи на Болсонаро во повеќе бразилски градови. Демонстрациите беа поттикнати од неодамнешните санкции што САД ги воведоа за Бразил и судијата Мораис, кој го води процесот против поранешниот крајно десничарски претседател.
– „Пуштете го Болсонаро да зборува!“
Во својата одлука, Мораес истакна дека Болсонаро учествувал од далечина во настани каде што демонстрантите користеле американски знамиња за да покажат поддршка за санкциите на САД наметнати на Бразил, што, според него, е обид за притисок на Врховниот суд.
Американскиот претседател Доналд Трамп неодамна воведе 50% царина на бразилскиот увоз, нарекувајќи ја истрагата против Болсонаро „лов на вештерки“. Ако биде прогласен за виновен, Болсонаро се соочува со казна до 40 години затвор.
САД вчера ја осудија наредбата на Мораис за воведување домашен притвор на Болсонаро.
„Судијата Мораис, кој веќе е санкциониран од САД како злоупотребувач на човековите права, продолжува да ги користи бразилските институции за да ја замолчи опозицијата и да ја загрози демократијата“, соопшти Стејт департментот преку платформата Х.
„Додавање уште ограничувања на способноста на Жаир Болсонаро да се брани во јавност не е јавна услуга. Пуштете го Болсонаро да зборува!“, се додава во соопштението.
Извор: Anadolu Agency (AA)
