Претседателката на државата, Гордана Силјановска Давкова, изјави дека состојбата е стабилна и под контрола, и оти не се очекуваат закани по безбедноста. Таа нагласи дека проблемите во соседството – институционалната криза во Косово и ситуацијата во Србија – немаат директно влијание врз земјава.
„Политичката состојба во Косово, како што знаете, е во институционална криза поради неможноста за конституирање на државните органи, а исто така и во соседна Србија има сериозни проблеми. Сепак, врз основа на аргументите и податоците, заклучивме дека овие предизвици не претставуваат закана по безбедноста на Северна Македонија“, изјави претседателката Гордана Силјановска Давкова.
Силјановска Давкова се осврна и на пожарите, кои според неа, во најголем дел не се последица на високите температури, туку постојат сомнежи дека се подметнати. Истрагата е во тек, а во седницата учествуваше и Стојанче Ангелов од Дирекцијата за заштита и спасување.
„Голем дел од пожарите не се предизвикани од високите температури, туку има основани сомнежи дека се намерно подметнати. Се разбира, бидејќи станува збор за предистражна постапка, сè уште се работи со претпоставки“, изјави претседателката Гордана Силјановска Давкова.
На седницата на Советот за безбедност, на покана на претседателката, присуствуваа директорот на Агенцијата за национална безбедност, Бојан Христовски, и директорката на Агенцијата за разузнавање, Габриела Јаковлева.
„Иако не беше на дневен ред, на седницата на Советот за безбедност беше спомнат и процесот на локалните избори. Претседателката посочи дека не смее да се дозволи ослободување на криминалци од затвор, нешто што, како што рече, се случувало во претходни изборни кампањи“, пренесува репортерот на ТВ21, Аднан Ќаили.
Членови на Советот за безбедност, по функција, се: Африм Гаши – претседател на Собранието, Христијан Мицкоски – претседател на Владата, Панче Тошковски – министер за внатрешни работи, Владо Мисајловски – министер за одбрана, како и тројцата членови назначени од претседателката: Џевдет Хајредини, Малинка Ристевска-Јорданова и Владо Спиридонов. Министерот за надворешни работи и надворешна трговија, Тимчо Муцунски, не присуствуваше поради службено патување во странство.
ИЗВОР: ТВ 21
