Соединетите Американски Држави ги намалија царините од 33 на 15 отсто за Македонија. Со ова државава се изедначи со тарифите кои се определени за целата Европска Унија. Сепак, премиерот Христијан Мицкоски верува дека ова не е крајниот исход од преговорите со американската администрација.
„Ние продолжуваме и понатаму да преговараме и оптимиста сум дека ќе одиме уште подоле“, порача Христијан Мицкоски.
Премиерот Мицкоски очекува преговорите да продолжат после 15 август кога ќе завршат одморите на луѓето од американската и од македонската администрација.
Директорот на Царината, Бобан Николовски вели дека царините нема негативно да се одразат на македонската економија.
„Не очекувам да биде удар. Мислам дека тука релативно ќе се движи, на исто ниво ќе останат. Ние претходно правевме анализи, дадовме мислење до Министерството за финансии по точки кои ни побараа да дадеме и укажавме колкави ќе бидат средствата што може да се изгубат ако ние одиме со нула спрема Соединетите Американски Држави или обратно, они сега со 15 отсто према нас, што не е конечно, мислам дека нема да има голем потрес“, вели Бобан Николовски.
Македонија во САД извезуваат пред се моторни и специјализирани возила, а најмногу се увезуваат наменски производи.
Инаку, и покрај воведените царини од американската администрација, македонските компании во првите пет месеци од 2025 имаат поголем извоз отколку што е увезено во државава. По ланскиот дефицит што сме го имале од над 77 милиони долари, за првите пет месеци имаме суфицит од 24 милиони долари што значи дека и покрај царините сме го зголемиле извозот.
Изненадувачки, во оваа нова одлука на Трамп, најлошо помина Швајцарија која има 39 отсто царини.
ИЗВОР: ТВ 21
