Во последните 24 часа регистрирани се вкупно 40 пожари, од кои 33 се изгаснати, 5 сè уште се активни, а 2 се ставени под контрола.
Според оперативниот план подготвен од Централниот штаб за управување со кризи, покрај екипите на Јавното претпријатие „Македонски шуми“, од утринава се активирани и два Air-Tractor авиони на Дирекцијата за заштита и спасување, како и специјализирани возила – пизгауери.
„Сè уште е активен пожарот во Општина Василево, кој во последниве два дена се прошири и кон Општина Радовиш, кај селото Вичино, поточно на Големата Планина, каде што гори висока шума и ниска вегетација.“, вели Надица Вчкова.
Директорот на Дирекцијата за заштита и спасување, Стојанче Ангелов, изјави дека вчера попладне, во заедничка акција со МВР, во атарот на Осоговските планини биле пронајдени десетици автомобилски гуми, за кои постои сомнение дека биле намерно запалени.
Во гаснењето на пожарите во изминатиот период учествуваат два Ер Трактори, а третиот со кој располага дирекцијата за Заштита и спасување се уште е на сервис. Во гаснењето учествуваат и хелихоптер на МВР и АРМ.
„Третиот Air-Tractor се очекува да се врати од сервис на почетокот на август, фирмата што го сервисира има многу работа и не може да постигне. Се појавија неочекувани дефекти кои одзедоа повеќе време. На располагање имаме два полициски хеликоптери и два од Армијата.“, вели Стојанче Ангелов.
Што се однесува до владината мерка за времено вработување на 400 пожарникари, Ангелов вели дека досега се пријавиле околу 500. Тие ќе бидат обучени за учество во акциите на Дирекцијата за заштита и спасување. Инаку, властите апелираат до сите граѓани доколку забележат сомнително однесување што укажува на намера за предизвикување пожар далеку од населено место – како што се гуми, дрвени палети, пластични шишиња, веднаш да пријават на 112 или во најблиската полициска станица, или кај полициски службеник или припадник на друг безбедносен сервис.
ИЗВОР: ТВ 21
