Грција го отвора прашањето за неспроведување на Преспанскиот договор од македонска страна. Забелешките се нотирани на средбата во Атина помеѓу министерот за надворешни работи Тимчо Муцунски и неговиот колега Јоргос Герапетритис.
Атина изразила загриженост поради зачестената употреба на името Македонија без „Северна“ од страна на претседателката Гордана Силјановска-Давкова и министрите, објавија грчките медиуми.
„Би сакал повторно да ја нагласам поддршката на Грција за напредокот на на Северна Македонија на нејзиниот европски пат, заснован на воспоставените условености и принципот на сопствени заслуги, со посебен акцент на фундаменталните вредности. Во тој контекст, дозволете ми да ја подвлечам крајната важност на целосната, доследна и искрена имплементација на Договорот од Преспа, вклучително и употребата на уставното име на државата од страна на нејзините институции“, вели Јоргос Герапетритис.
Министерот Муцунски рече дека на средбата ја нагласиле важноста на меѓународното јавно право и обврските кои ги имаме преземено – бидејќи взаемната почит е темелот врз кој се гради трајната соработка. А во фокусот биле и безбедноста, билатералната соработка, економијата и инвестициите.
„Ја изразив мојата благодарност за цврстата поддршка од Грција за нашиот европски пат и нејзината трајна улога во промовирањето на европската иднина на Западен Балкан.Тоа партнерство не само што го цениме – го сметаме за суштинско. Се фокусиравме и на конкретниот напредок кој носи резултати за нашите граѓани – инвестиции, трговија, инфраструктура, енергија. Разговаравме за проекти како Коридор 10 и гасниот интерконектор“, вели Тимчо Муцунски.
Муцунски се заблагодари на грчкиот колега за солидарноста што Грција ја покажа за време на трагедијата во Кочани и неодамнешните пожари близина на Дојран. „Тоа не беа само гестови на помош – туку вистински дела на пријателство“- рече Муцунски.
ИЗВОР: ТВ 21
