Подобро подоцна отколку никогаш! Министерката за образование Весна Јаневска ги промовираше учебниците за странски јазици што со години недостасуваа, а кои ги изучуваат нашите ученици. Но, таа вели дека печатените книги веќе се „старо училиште“.
„Нека види целата јавност дека по многу години недостаток на овие книги од прво до деветто одделение, еве и овие за германски јазик веќе се одобрени, постапката тече и сум уверена дека до 1 септември ќе ги имаме сите учебници.“
Министерството за образование ќе ангажира приватни партнери без надомест за поддршка на вештачката интелигенција во образовните платформи. Јаневска изјави дека во оваа насока образовниот систем значително заостанува, додека новите генерации ученици се напредни во технологијата. Таа додаде дека таблите со креда во училниците треба да бидат заменети со паметни таблети, а учениците да научат како да го користат ChatGPT во насока на унапредување на наставниот процес.
„Најголемата корист што учениците според мене ќе ја имаат преку користење на вештачката интелигенција во образовните програми, е тоа што ќе се развие креативното размислување, односно ќе ги поттикне да размислуваат и ќе им овозможи да вежбаат нешта што, според резултатите од ПИСА тестирањето, им недостасуваат на нашите ученици. За сето тоа да се постигне, државата треба да има капацитет. Имаме одлични факултети за информатика, но секоја дополнителна помош е добредојдена бидејќи немаме време. Она што требало да се направи во последните 7–10 години, не е направено.“, вели Весна Јаневска.
Преку вештачката интелигенција, наставниците ќе можат да креираат наставни планови, да организираат административни документи. За соодветните предмети ќе можат да прават наставни транскрипти, тестови, вежби. Учениците, пак, преку заедничка платформа ќе можат да решаваат задачи, да одговараат на прашања од учебниците и да користат други можности – велат од приватното друштво за онлајн едукација.
„Ќе го направиме бесплатно засекогаш – ако ја посетите ‘Universum.com’, тоа е туторијална платформа по информатика базирана на вештачка интелигенција и е прилагодена на програмата на Министерството за образование во сите средни училишта. Ја лансиравме пред неколку месеци, но во мај и јуни поради матурите ја користеа околу 1.400 средношколци дневно, како вежби по математика.“, вели Петар Ниновски.
На таа платформа се приклучени 3.700 наставници од целата земја, но според надлежните тоа не е доволно, па ќе се иницираат обуки за сите да можат да го користат системот на вештачка интелигенција.
Поради тоа, Министерството за образование и наука потпиша меморандум за соработка со две приватни компании од оваа област, кои ќе бидат ангажирани во средните училишта.
ИЗВОР: ТВ 21
