Новинарот Жозеп Педрерол објави какви се плановите на „кралевите“ со Гонзало Гарсија и Ендрик, момчето од школата ќе продолжи со првиот тим додека пак засилувањето од 72 милиони евра ќе биде испратено на позајмица.
Гонзало Гарсија доби шанса да го предводи нападот на Реал Мадрид на Светското клупско првенство и одлично ја искористи укажаната прилика, постигна четири погодоци, забележа две асистенции и турнирот во САД го заврши како најдобар стрелец.
Квалитетните партии го привлекоа вниманието, се шпекулира дека преку 10 клубови од Шпанија, Италија и Англија пројавиле интерес за негов ангажман.
Се говореше дека „кралевите“ би можеле да го жртвуваат Гонзало Гарсија и да го продадат со цел да приберат средства за засилување на тимот, но последните информации велат дека момчето од школата останува.
Како што пренесува новинарот Жозеп Педрерол, планот е Гонзало Гарсија да продолжи со првиот тим на Реал.
Мадрид ќе го напушти Ендрик, засилувањето од 72 милиони евра ќе биде испратено на позајмица во клуб кој ќе може да му гарантира поголема минутажа.
Останува да се види што ќе се случи во следниот месец ипол, и дали Реал Мадрид ќе мора да крои нови планови – одредени извори велат дека Ендрик не сака да замине, целта му е да се наметне кај Чаби Алонсо.
Извор: kurir.mk
