За првпат во својата 148-годишна историја, најпрестижниот тениски турнир во светот – Вимблдон – ќе се игра без линиски судии. Нивното место го зазема технологијата.
Денеска започнува ново издание на Вимблдон, турнир кој со право го носи епитетот неофицијално светско првенство во тенис. Сепак, ова лето сè е поинаку, бидејќи за првпат од неговото основање во 1877 година, повеќе нема да има линиски судии на терените на „Ол Ингланд Клуб“.
Наместо нив, секоја одлука ќе ја носи вештачката интелигенција. Легендарното „око соколово“, кое од 2007 година им беше помош на играчите за проверка на спорните поени, сега ја презеде целосната контрола врз линиите.
Ова значи дека околу 300 судии, кои секоја година се грижеа за регуларноста на играта и добиваа дневна плата од 180 фунти, ги загубија своите работни места. Иако столчињата за главните судии ќе останат, нивната улога ќе биде сведена на минимум.
Веруваат во технологијата
„Ол Ингланд Клуб“ велат дека оваа одлука е донесена по внимателно тестирање и анализа, и дека новата технологија обезбедува максимална прецизност и праведност.
– Веруваме дека е вистинско време да се преземе овој чекор. Технологијата ја докажа својата точност, а условите за играчите ќе бидат исти како и на многу други турнири – изјави Сали Болтон, извршен директор на турнирот.
Извор: kurir.mk
