Поднесени измени на Законот за јавни патишта: Ќе се подобрува безбедноста и модернизира системот за наплата на патарини

Пратеничката од редовите на ВМРО-ДПМНЕ, Бети Стаменковска-Трајковска денеска изјави дека во Собранието се поднесени измени на Законот за јавни патишта, со кои, според неа ќе се зголеми безбедноста и ќе се промени системот на наплата на патарните, со цел да се избегнат гужви и метежи на наплатните станици. Исто со овие измени се планира одредена категорија на граѓаните да се ослободат од плаќања на патарини.

„Заедно со неколку пратеници и во консултација со Министерот за транспорт, господинот Александар Николоски и неговиот кабинет, поднесовме измени на Законот за јавни патишта.

Ќе ги издвојам трите најзначајни новини од предложените измени:

1. Подобрување на безбедноста на патиштата

Во предложениот закон се вклучува нова, појаснета дефиниција за експресен пат, што ќе овозможи подобро планирање и уредување на патната мрежа. Дополнително, се проширува можноста за примена на мерки за забавување на сообраќајот на јавни патишта, во согласност со стандардите за сообраќајна безбедност – сè со цел да се намалат ризиците и да се заштитат сите учесници во сообраќајот.

 2. Модернизација на системот за наплата на патарина

Соочени со предизвиците од сè поголемиот сообраќаен интензитет, предвидуваме воведување на постпејд и припејд модели за наплата на патарина, како и можност за надополнување на електронските уреди – М-карта и М-таг – преку широка мрежа на малопродажни објекти низ целата држава. Целта е да се намалат гужвите на наплатните станици, да се зголеми ефикасноста и да се поттикне користење на електронски системи за плаќање.

 3. Ослободување од патарина за специфични категории граѓани

Социјалната димензија на овие измени предвидува ослободување од плаќање патарина за лицата кои имаат извршена трансплантација на орган или ткиво, како и за донори на органи или ткива. Веруваме дека ова е мал, но значаен чекор во насока на поголема поддршка и почитување кон овие лица.

Со овие измени поставуваме нови стандарди за безбедно, модерно и правично користење на патиштата во Република Македонија.“, рече Стаменковска-Трајковска.