АТИНА (АА) – Норвешкиот министер за надворешни работи Еспен Барт Еиде денес изјави САД „сега директно зедоа учество во војна што започна кога Израел го нападна Иран“, по американските воздушни напади врз три ирански нуклеарни постројки, објави јавниот радиодифузен сервис, пренесува Анадолу.
Еиде им рече на новинарите: „Длабоко сме загрижени за оваа понатамошна ескалација на војната на Блискиот Исток, преку американските напади врз иранските нуклеарни постројки“, објави јавниот радиодифузен сервис НРК.
„Ова значи дека тие (САД) сега директно учествуваат во војна што започна кога Израел го нападна Иран“, додаде Еиде.
„Меѓународното право мора да го почитуваат сите страни. И сега кога има многу индикации дека ќе видиме понатамошна ескалација на војната, мора да се потсетиме на важноста на меѓународното право“, подвлече Еиде.
Премиерот Јонас Гар Сторе, исто така, истакна дека Норвешка е загрижена од понатамошна ескалација на војната на Блискиот Исток.
„Жално е што работата за наоѓање дипломатско решение и нов нуклеарен договор со Иран не напредна“, додаде тој.
Ситуацијата во регионот дополнително се влоши откако американскиот претседател Доналд Трамп денес соопшти дека американските сили извршиле „многу успешни“ воздушни напади врз три ирански нуклеарни постројки, поради растечките стравувања од поширок конфликт во регионот.
По американските напади, Иран го повика Советот за безбедност на ОН да одржи итен состанок за да ја осуди агресијата на САД и да ги повика на одговорност оние што го кршат меѓународното право.
Непријателствата избувнаа на 13 јуни кога Израел започна воздушни напади врз неколку локации низ Иран, вклучувајќи воени и нуклеарни постројки, што го натера Техеран да започне одмазднички напади.
Израелските власти соопштија дека најмалку 25 лица се убиени, а стотици се повредени од тогаш во иранските ракетни напади.
Во Иран, 430 лица се убиени, а повеќе од 3.500 се ранети во израелските напади, според иранското Министерство за здравство.
Извор: Anadolu Agency (AA)
