Министерот за транспорт и врски и вицепремиер, Александар Николоски, денеска соопшти дека веќе е распишан јавниот повик за набавка на 120 електрични еколошки автобуси, со рок за доставување на понудите од 30 дена, односно до средината на јули.
– Се надевам дека ќе има голема конкуренција и дека ќе се јават повеќе компании, со што ќе добиеме најдобри автобуси по најдобра цена, изјави Николоски, на настанот за пуштање во употреба на реконструираниот пат Понов мост – Богданци, каде присуствуваше и премиерот Христијан Мицкоски.
Според Николоски, новите автобуси ќе бидат опремени со станици за полнење, планирани во сооднос од најмалку една станица на два автобуси, што ќе обезбеди ефикасен и одржлив систем.
– Очекуваме 80 автобуси да бидат наменети за градскиот превоз во Скопје, додека останатите 40 ќе бидат распределени на општини што вршат јавен превоз, додаде министерот.
Целта, како што посочи, е подобрување на јавниот транспорт, но и значително намалување на загадувањето.
– Со оваа набавка не само што ќе овозможиме побрзо и поефикасно движење на граѓаните во нивните општини, туку и ќе дадеме сериозен придонес за заштита на животната средина, бидејќи се работи за целосно електрични автобуси, рече Николоски.
Проектот се реализира во рамки на заложбите на Владата за зелена транзиција и модерен јавен превоз, со фокус на урбани и еколошки решенија.
ИЗВОР: ТВ 21
