Градоначалникот на Струмица, Костадин Костадинов, ја одбил средбата со министерката за финансии Гордана Димитриевска-Кочовска, која ја побарала таа по јавната реакција на струмичани за недавањето согласност за вработување на негувателки и воспитувачи во градинките во Струмица, објави на неговиот фејсбук профил струмичкиот градоначалник.
Во објавата тој наведува повеќе причини за одбивањето да се сретне со министерката.
„Првата причина е тоа што се бараше на средбата да одам само јас, а таму да дојдат од советничката група на ВМРО-ДПМНЕ. Таква нетранспарентна средба не прифаќам. Или е тет-а-тет или сите заедно. Моделот на средби со “шушкање” не го прифаќам. Втората причина поради која ја одбив средбата е непрофесионализмот на Министерството. Имено, со месеци не ни е исплатен повратот на ДДВ на јавното претпријатие за транспорт во Струмица со цел истото да биде блокирано, струмичани да немаат јавен превоз а ВМРО-ДПМНЕ да има тема за политичко лешинарство. Иако во повеќе наврати повикував, немаше слух од надлежната министерка се додека не видоа некоја политичка придобивка за нив од остварување на средба, наведува во објавата Костадинов“.
Додава дека проблемот со недостаток на кадар во градинките во Струмица го решаваат сами.
„Сега нема зошто да се гледаме, задоцнивте како што доцните и со довршувањето на регионалниот пат кај Дабиле кон бугарската граница. Доцните и со компјутерска томографија во Струмичката болница. Доцните и со проектите ветени за Струмица. Доцните со правдата, а често и ја опструирате“, напиша Костадинов.
Инаку, недавањето согласност за вработувања во во струмичките градинки по основ на заминување во пензија се разгледуваше и на последната седница на Советот на Општината, на која по меѓусебни обвинувања меѓу советниците, беше изнесена информација од советничка на ВМРО ДПМНЕ дека бил постигнат некаков начелен договор за средба на министерката за финансии со општинското раководство за почетокот на наредната недела за да се најде решение на проблемот.
ИЗВОР: racin.mk
