ИСТАНБУЛ (АА) – Најпознатиот планинарски водич од Непал, Ками Рита, припадник на етничката група Шерпа, утринава повторно се искачи на Монт Еверест, достигнувајќи го врвот по рекорден 31. пат и со тоа го продолжи својот светски рекорд за најмногу успешни искачувања на највисокиот врв во светот, пренесува Анадолу.
Според весникот „Катманду пост“, 55-годишниот планинар пристигнал на врвот висок 8.848 метри околу 4 часот по локално време, предводејќи ја експедицијата на Индиската армија наречена Авантуристичко крило Еверест.
Мингма Шерпа, од организаторската компанија „Севен Сумит Трекс“, ја потврди веста и истакна дека Ками Рита е неприкосновен носител на рекордот.
„Овој нов подвиг само ја зацврстува неговата позиција како човек со најмногу искачувања на врвот на светот, рекорд до кој никој друг не се приближил“, изјави тој.
Ками Рита е безбеден и стабилен по искачувањето. Веќе започнал со симнување и на пат е кон базниот камп.
Поради рекордните искачувања, Ками Рита ги доби прекарот Човекот од Еверест. Првпат се искачил на Монт Еверест во 1994 година, а во 2023 година го постигна тоа дури двапати. Неговиот најблизок ривал, исто така, Непалец, Пасанг Дава Шерпа, има 29 искачувања.
Непал е дом на осум од 10 највисоки врвови во светот, а планинарството е голема туристичка активност и извор на приход, како и вработување за малата земја на Хималаи.
Извор: Anadolu Agency (AA)
