Со последното линеарно зголемување на пензиите за 5.000 денари, најниската пензија во март 2025 година достигна 18.192 денари, додека просечната пензија изнесува 26.258 денари. Владата истакна дека со ова го исполни своето ветување за зголемување на пензиите на над 330.000 пензионери, нагласувајќи дека нивниот фокус останува на обезбедување сигурен и достоинствен живот за пензионерите. Покрај тоа, потврдија дека нема да ја зголемуваат старосната граница за пензионирање, која останува 62 години за жени и 64 години за мажи, со минимум 15 години стаж.
Сепак, од септември годинава пензиите повторно ќе се усогласуваат според старата методологија, откако Собранието ги усвои измените и дополнувањата на Законот за пензиско и инвалидско осигурување. Со ова, досегашното линеарно зголемување од 2.500 денари во септември 2024 и дополнителни 2.500 денари во март 2025 се става вон сила. Наместо тоа, пензиите ќе се зголемуваат според индексот на трошоците на живот (50%) и порастот на просечно исплатената плата (50%).
Оваа промена предизвика поделени мислења меѓу пензионерите. Некои сметаат дека старата методологија е поповолна бидејќи го следи реалниот пораст на трошоците за живот, додека други ја преферираат фиксната сума бидејќи обезбедува конкретна финансиска помош во услови на инфлација.
Економските експерти сметаат дека враќањето на старата методологија ќе има различни ефекти врз пензионерите во зависност од нивната моментална пензија и инфлацијата. Според нив, фиксното зголемување било најкорисно за пензионерите со пониски примања, додека старата методологија долгорочно ќе донесе стабилност. „Новата-стара методологија подобро ги следи економските параметри, но во услови на висока инфлација може да се покаже како недоволна за пензионерите со најниски приходи“, велат експертите.
Пратеничката на СДСМ, Јованка Тренчевска, предупреди дека измените негативно ќе влијаат врз 12.000 пензионери кои примаат пензии во други држави, бидејќи тие нема да можат да ги добијат новите покачувања. „Ова може да предизвика реципрочни мерки од други земји, што ќе ги засегне и македонските пензионери кои живеат во странство“, истакна таа. Од ВМРО-ДПМНЕ, пак, ја поддржаа одлуката, нагласувајќи дека со двојното линеарно покачување во изминатите месеци е овозможен значителен раст на пензиите.
Иако секое зголемување е добредојдено, пензионерите остануваат загрижени за нивната финансиска сигурност. „Цените постојано растат, а повеќе од половина од пензијата оди на храна и лекови“, вели пензионер од Ѓорче Петров. Во наредните месеци ќе се види како ќе се спроведува новата методологија и дали пензионерите навистина ќе почувствуваат подобрување во нивниот животен стандард.
ИЗВОР: racin.mk
