Македонија и Бугарија уште еднаш ќе си подадат рака, за жртвите во една од најголемите трагедии во Кочани, во која 59 млади животи загинаа во страотен пожар во ноќен клуб. Хуманитарниот фудбалски натпревар ќе се одржи на 27 април на стадионот Спартак во Варна, информира Фондацијата „Национали 94“, која е организатор на настанот во партнерство со општина Варна. Собраните средства ќе бидат донирани за лекување на настраданите од пожарот кон средината на минатиот месец.
На натпреварот за тимот на Бугарија, кој ќе го води селекторот Димитар Пенев со помошникот Красимир Борисов, ќе настапат голем број играчи кои завршија како четврти на СП 1994 година во САД.
Тоа се Христо Стоичков, Борислав Михајлов, Емил Кременлиев, Златко Јанков, Емил Костадинов, Јордан Лечков, Наско Сираков, Даниел Боримиров, Пламен Николов Бончо Генчев, Ивајло Јорданов, Илијан Кирјаков, Петар Михтарски, Петар Георг Александриков и Георги Георгиев, Красимир Балаков и Иваило Андонов кои според бугарските медиуми го потврдија своето учество.
На натпреварот за Бугарија ќе настапат и поранешните репрезентативци Радостин Станев, Елин Топузаков, Гошо Гинчев, Станислав Ангелов, Дончо Донев, Александар Александров-Кривија, Мартин Камбуров и Валери Божиов.
Македонија уште го крои тимот и прави листа со кои ќе се појави во Варна, а она што е сигурно е дека тренер ќе биде најтрофејниот Ѓоко Хаџиевски. Главна ѕвезда во тимот ќе биде легендата Горан Пандев кој сега е во улога на функционер во ФФМ, а се очекува да играат повеќе познати имиња од генерациите од осамостојувањето.
Извор: kurir.mk
