Актуелниот американски претседател Доналд Трамп воведе нови царини за 60 држави, вклучително и Македонија, како и земјите од регионот, со што значително ќе се промени динамиката на увозот во САД.
За Северна Македонија е воведена царина од 33%, додека пак Србија е погодена со највисока стапка од 37%, Босна и Херцеговина со 35%. На увезените стоки од Косово е воведена царина од 10%, исто како и за Албанија.
При објавување на царините, Трамп порача дека 2 април 2025 година ќе биде запаметен како „Ден на ослободување“.
„Ова е моментот кога ќе ја збогатиме Америка повторно! Нашите работници и бизниси беа жртви на странски мршојадци, но тоа завршува денес“, изјави Трамп.
Според новите мерки, царините на производи од Европа ќе изнесуваат 20%, а најниската тарифа за увоз во САД ќе биде 10%. Посебно ги нападна трговските практики на Канада, Мексико и Кина, инсинуирајќи дека сегашните американски власти ги поттикнуваат економските загуби.
Трамп исто така порача дека американската економија ќе стане самоодржлива, најавувајќи дека домашните компании ќе бидат приморани да произведуваат во САД или да плаќаат високи такси.
Во завршниот дел од говорот, тој повторно ја критикуваше администрацијата на Бајден, се осврна на границите и миграцијата, како и на војната во Украина, ветувајќи дека ќе ја прекине.
„Прво ќе ја ослободам Америка! Ви благодарам и Господ да ги благослови САД“, порача Трамп, потпишувајќи ги новите трговски мерки, кои ќе имаат сериозни последици во светската економија.
ИЗВОР: ТВ 21
