Министерството за внатрешни работи ја информира јавноста дека од средина на месец април (14.04.2025) официјално ќе започне со работа заедничката гранична контрола (One Stop Shop) на заеднички граничен премин Долно Блаце – Елез Хан.
Овој чекор претставува конкретна реализација на билатералната соработка помеѓу Република Северна Македонија и Република Косово, со цел олеснување на прекуграничното движење, намалување на времето на чекање и зголемување на ефикасноста на граничните контроли.
Инаку и од Амбасадата на Република Косово во Скопје информираа дека новиот граничен режим меѓу Република Косово и Република Северна Македонија ќе биде операционализиран кон средината на април 2025 година. Продолжувањето за неколку дена е направено заради завршните технички и логистички подготовки на тимовите кои интензивно работат на имплементација на овој важен меѓудржавен договор.
Потсетуваме дека новиот граничен режим ќе се заснова на моделот „влез-влез“, каде контролите ќе се вршат само на влезот од соодветната државна полиција, додека полицијата ќе работи во заеднички објект. Неговата имплементација ќе се спроведува паралелно на граничните премини Хани и Елезит/Блаце и Глобочице/Јажинце. Овој модел се очекува да го намали чекањето и е во функција на олеснување на движењето на граѓаните на двете земји кои се повеќе патуваат во двете насоки.
ИЗВОР: ТВ 21
