ИСТАНБУЛ (АА) – Најмалку 19 лица загинаа во пожарите што се шират низ југоисточна Јужна Кореја, при што властите денес потврдија дека противпожарен хеликоптер се урнал за време на напорите за гаснење на пламените јазици, јавува Анадолу.
Според сеулската новинска агенција Јонхап, три жртви биле пронајдени во Андонг, главниот град на провинцијата Северен Геонгсанг, три во Чеонгсонг, шест во Јеонгјанг, а уште седум во Јеонгдок. Едно лице се води како исчезнато во Чеонгсонг, додека 10 други се повредени, од кои две се во тешка состојба.
Животот го загуби и 73-годишен пилот кога неговиот хеликоптер С-76 – кој бил во служба 30 години – се урна додека се борел со пожарите во Уисеонг, околу 180 километри југоисточно од Сеул.
По несреќата, властите наредија приземјување на сите противпожарни хеликоптери.
Вршителот на должноста претседател, Хан Дук-су, ги опиша шумските пожари како „најлошите во историјата“ на земјата и повика на „максимални напори“ за нивно гаснење.
Според него, пожарите досега зафатиле 17.000 хектари, уништиле 209 домови и фабрики, а околу 500 затвореници од еден затвор во Северен Геонгсанг биле евакуирани.
Во пожарот целосно е уништен и историскиот храм Гоунса во Уисеонг, кој бил изграден во 681 година од будистички монах за време на династијата Сила. Официјалните лица од културата успеале да ги спасат камениот Буда од 9 век и други историски артефакти пред пламените јазици да го зафатат храмот.
Илјадници пожарникари, десетици хеликоптери и итни служби се мобилизирани од минатиот петок, кога пожарите започнаа во округот Санчеонг, провинцијата Јужен Геонгсанг.
Поттикнати од силни, суви ветрови, пламените брзо се проширија кон север, зафаќајќи ги Уисеонг, Андонг, Чеонгсонг, Јеонгјанг и Јеонгдок.
Извор: Anadolu Agency (AA)
