Од ноќеска на полноќ цената на бензините ќе се зголеми за половина до еден денар, додека цената на дизелот ќе се намали за половина денар по литар, согласно одлуката на Регулаторната комисија за енергетика, водни услуги и услуги за управување со комунален отпад (РКЕ). Со оваа одлука, малопродажните цени на нафтените деривати се намалуваат за просечни 0,04 отсто во однос на претходната пресметка.
Малопродажната цена на бензинот ЕУРОСУПЕР БС-95 се зголемува за половина денар и ќе изнесува 75 денари за литар, додека ЕУРОСУПЕР БС-98 поскапува за еден денар и ќе се продава по 77,5 денари за литар. За разлика од тоа, цената на ЕУРОДИЗЕЛ (Д-Е V) се намалува за половина денар и ќе биде 68 денари за литар. Цената на Екстра лесното масло за домаќинство (ЕЛ-1) останува непроменета и ќе изнесува 68 денари за литар, додека цената на Мазутот М-1 НС се намалува за 0,590 денари по килограм, што ќе ја постави на 40,755 денари.
РКЕ посочуваат дека референтните цени на нафтените деривати на светскиот пазар бележат зголемување кај бензините за 2,721 отсто, како и кај екстра лесното масло за 0,706 отсто. Сепак, дизелот има намалување од 0,522 отсто, додека мазутот е поевтин за 1,881 отсто. Курсот на денарот во однос на доларот, по кој беа формирани цените при претходната пресметка, е понизок за 0,1162 отсто.
ИЗВОР: racin.mk
