Градинката во село Теарце, која требаше да биде готова во 2023 година, доцни поради пропусти во изградбата која започна со 2021 година и чекањето дозвола од Министерството за социјална политика. Градоначалникот на општината вели дека доцнењата се поврзани со дополнителни инвестиции и дека ги чекаат одобренијата за вработувања пред отворањето на градинката.
„Предлогот, систематизацијата ја испративме во Министерството за социјална политика, и тоа е одобрено. Овој предлог го испративме и до Министерството за информатика и администрација и до Министерството за финансии и не се сомневаме дека ќе добиеме позитивен одговор. Изработен е според барањата за потребите на оваа градинка. Нашето барање е за околу 70 вработувања“, вели Нухи Незири.
Според Незири запишувањето во градинката ќе започне по назначувањето на директор.
„Денеска советот ги именува членовите на одборот, утре ја имаме последната посета и во рок од осум дена од објавувањето во Службен весник отвораме конкурс за директор, бидејќи во моментот имаме в.д директор за овие постапки“, вели Нухи Незири. Со изборот на директорот започнува постапката за пријавување на децата и вработените во градинката.
Министерот за социјална политика Фатмир Лимани од јануари рече дека Теарце има дозвола за градинката.
„Теарце ја има дозволата, добиена и одобрена за градинката и се очекува истата да биде отворена“, вели Фатмир Лимани.
Во градинката во Теарце се очекува да бидат запишани 150 деца, додека оваа градинка ќе биде отворена и за деца со посебни потреби, бидејќи во барањето за вработување од оваа општина е вклучен и логопед и целиот неопходен кадар за овие деца.
ИЗВОР: ТВ 21
