ИСТАНБУЛ (АА) – Министрите за надворешни работи на Туркије и Украина, Хакан Фидан и Сергеј Лавров денес телефонски разговараа за ситуацијата во врска со руско-украинската војна, известува Анадолу.
Разговорот се случил пред учеството на Фидан на лидерската средба за Украина, најавена за недела во Лондон, каде денеска пристигна и украинскиот претседател Владимир Зеленски.
Британскиот премиер Кир Стармер претходно изјави дека тој ќе биде домаќин на средба на високо ниво во Лондон во недела и дека „се радува на учеството на турскиот министер за надворешни работи Хакан Фидан во разговорите“.
Министерот Фидан ќе размени мислења за клучните аспекти на тековната војна меѓу Русија и Украина, вклучувајќи ја и последната иницијатива за преговори предложена од американскиот претседател Доналд Трамп.
Шефот на турската дипломатија ќе ги наведе и потенцијалните придонеси на Туркије во овој процес и ќе ја повтори нејзината посветеност за праведен и траен мир, како и поддршката за територијалниот интегритет, суверенитет и независноста на Украина.
Фидан дополнително ќе ја нагласи подготвеноста на Анкара да ја продолжи својата посредничка улога, како што беше случајот со директните преговори меѓу Русија и Украина во март 2022 година.
Извор: Anadolu Agency (AA)
