По 12 години пауза, Попова Шапка беше домаќин на 41. Шарпланински скијачки куп, најстарото и најголемо скијачко натпреварување во Македонија и на Балканот. На манифестацијата, која се одржа во текот на два дена, учествуваа 37 натпреварувачи од Македонија, Србија, Бугарија, Турција, Хрватска, Црна Гора, Грција, Косово и Кипар.
Во севкупниот пласман, победник за 2025 година е Бугаринот Константин Стоилов, кој доминираше на сите четири трки во слалом, освојувајќи прво место. Второто место му припадна на неговиот сонародник Иван Главчев, додека третото место го делат Мирко Лазаревски од Македонија и Марко Семенџиев од Бугарија.
Во женска конкуренција, Лирика Дева од Косово го освои првото место, пред Миа Паул од Бугарија и македонската скијачка Ева Милевска.
Наградниот фонд за победниците изнесуваше 1.000 евра за првопласираните, 700 евра за второпласираните и 500 евра за третопласираните. Традиционално, севкупниот победник, Стоилов, доби и куче шарпланинец, како дел од наградата.
Шарпланинскиот скијачки куп се одржува од 1947 година, а во 1957 година беше вклучен во официјалниот календар на ФИС. Иако купот имал неколку прекини поради недостаток на снежна покривка и организациски проблеми, оваа година се врати со голем успех и многу учесници.
ИЗВОР: racin.mk
