На денешен ден пред 61 година, од импровизирано студио биле емитувани првите вести на тогашната Радио-телевизија Скопје (РТС или ТВС). Дневникот траел 20 минути.
Уредник бил Димче Божиновски, а спикери Бранка Станковска и Александар Ацев.
Во периодот 1960-1962 година Радио Скопје, што се однесува во програмските зафати, оформило екипа и испратило свои работници на обука во радиотелевизиските центри во Белград и Загреб и интензивно се подготвувало за освојување и на тој сегмент од радиодифузијата.
Во 18:15 часот ТВ Дневник весник во траење од 20 минути, потоа цртан филм и детска емисија, образовна емисија, странски јазици, емисија од културата, ЕПП… Така, пет дена во неделата. Создадени биле доволен број емисии и репортажи за предвидените термини, а детските куклени и образовните емисии се емитувале во живо. Така до 20 часот, а потоа вклучување во заедничката програма на Југословенската радио-телевизија.
Во текот на летото 1964 година се реализирале директни преноси на спортски, фолклорни и забавно-музички приредби од „Средбата на солидарноста“.
Извор: kurir.mk
