Пред протестот, ССМ удира со бројка: 160.000 работници под прагот на сиромаштија, со што синдикатот директно ја засилува пресметката со Владата и работодавачите околу минималната плата. Претседателот на ССМ, Слободан Трендафилов, денеска изјави дека официјалните статистички податоци покажуваат оти синдикалните барања за повисоки примања се оправдани и издржани, во услови кога, според податоците што ги повикува синдикатот, една третина од работниците живее со плата што не го покрива ни основниот праг на сиромаштија.
На таа основа, ССМ го повика членството и граѓаните да се приклучат на протестот најавен за сабота, со порака дека законското усогласување на минималната плата не е доволно. Трендафилов тврди дека продуктивноста на работниците е далеку повисока од нивните примања, а синдикатот смета дека сегашниот модел нуди премал раст во време кога трошоците за живот продолжуваат да растат.
Дополнителен притисок ССМ прави и врз Економско-социјалниот совет. Од синдикатот повторно ги оспорија одлуките и заклучоците од последниот состанок на ЕСС, со образложение дека биле донесени без кворум и без согласност од двата репрезентативни синдикати, што според нив ја доведува во прашање и легитимноста на целата постапка околу минималната плата. Во таа смисла, денешната прес-конференција не беше само повик на протест, туку и обид однапред да се делегитимира секое решение што би се свело само на формално усогласување.
Суштината на синдикалната порака е дека спорот повеќе не е само околу износот на минималецот, туку околу тоа дали државата прифаќа дека има маса вработени луѓе кои, и покрај тоа што работат, остануваат сиромашни. Ако до крајот на месецот навистина има нов состанок на ЕСС, како што очекува ССМ, дебатата тешко ќе може да се сведе на техничко усогласување, откако синдикатот веќе ја изнесе најтешката бројка во јавноста: дека десетици илјади работници во Македонија работат, а не можат да излезат од сиромаштија.
Извор: zurnal.mk
