ЛОНДОН (АА) – Украинскиот претседател Владимир Зеленски изјави дека доколку украинската територија под контрола на Киев биде ставена под чадорот на НАТО, може да се постигне договор за прекин на огнот со Русија за да се стави крај на „жешката фаза“ на војната, известува Анадолу.
Зеленски во интервју за Sky News зборуваше за руско-украинската војна и во таа прилика рече дека членството во НАТО треба да им се понуди на неокупираните области на неговата земја за да се стави крај на „жешката фаза“ од војната.
„Доколку сакаме да ја запреме „жешката фаза“ на војната, мораме да ги ставиме украинските територии што се под наша контрола под чадорот на НАТО. Мораме да го направиме тоа брзо, а потоа можеме дипломатски да ја вратиме окупираната територија на Украина“ појасни Зеленски.
Наведувајќи дека прекинот на огнот е потребен за да се осигура дека рускиот претседател Владимир Путин нема да се врати за да преземе повеќе украинска територија, Зеленски истакна дека НАТО треба веднаш да го вклучи делот на Украина што е под контрола на Киев во членството.
Зеленски изјави дека ова и е многу потребно на Украина, во спротивно Путин ќе се врати.
Запрашан како гледа на Доналд Трамп, кој победи на претседателските избори во Соединетите Американски Држави, Зеленски истакна дека со новиот претседател треба да работат на тоа да имаат најголема можна поддршка.
„Сакам да работам директно со него бидејќи различни гласови доаѓаат од луѓето околу него. Затоа не треба да дозволиме никој околу нас да ни ја попречува комуникацијата“, нагласи Зеленски.
Извор: Anadolu Agency (AA)
