БЕРЛИН (АА) – Украинскиот претседател Владимир Зеленски изјави дека контактирал со кинеското раководство и побарал од нив да не ѝ даваат никаква поддршка на Русија во војната против Украина, пренесува Aнадолу.
„Се надевам дека Владата во Пекинг ќе задржи прагматичен став, во спротивно ризикуваме трета светска војна – сите сме свесни за тоа“, изјави Зеленски во интервју за италијанскиот дневен весник „Ла Република“.
Тој додаде дека Украина отсекогаш имала одличен однос со Кина и во интерес на сите е тоа да не се влошува.
Иако Кина се смета за еден од клучните поддржувачи на Русија, таа сè уште не обезбедува воена поддршка за Москва. Меѓутоа, САД тврдат дека Кина наскоро може да испорача оружје.
Американскиот државен секретар Ентони Блинкен во неделата за „Си-би-ес“ зборуваше за извештаите дека Кина размислува да обезбеди смртоносна поддршка за Русија.
На прашањето што мисли, Блинкен одговори: „Оружје, првенствено оружје.“
Зеленски го критикуваше францускиот претседател Емануел Макрон поради тоа што постојано барал разговори со Русија.
„Тоа ќе биде неуспешен дијалог. Всушност, Макрон губи време. Заклучив дека не сме во состојба да го промениме рускиот став“, рече Зеленски.
Извор: www.aa.com.tr
