Зеленски со благодарност до Бајден за поддршката кон Украина: Moра да обезбедиме победа оваа година

Употребувајќи ги истите зборови со кои се обрати и Бајден во својот говор „Киев стои силно. Киев стои гордо и најважно, Киев стои слободно“, Зеленски порача дека обединета со САД, Украина цели кон својата победа над Русија, која како што посочи, мора да се случи оваа година

Украинскиот претседател Володимир Зеленски вечерва преку објава на Твитер му се заблагодари на американскиот претседател Џо Бајден за поддршката која Украина ја добива од Соединетите Американски Држави, откако Бајден во својот говор од Варшава порача дека сојузниците стојат цврсто против руската агресија.

Употребувајќи ги истите зборови со кои се обрати и Бајден во својот говор „Киев стои силно. Киев стои гордо и најважно, Киев стои слободно“, Зеленски порача дека обединета со САД, Украина цели кон својата победа над Русија, која како што посочи, мора да се случи оваа година.

„Му благодарам на претседателот Бајден и на цела Америка за нивното лидерство во обединувањето на светот за поддршка на слободата и за нивната витална помош за Украина. Заедно одиме кон заедничка победа и мора да ја обезбедиме веќе оваа година! Сите стоиме обединети и храбри – Украина, САД и целата наша коалиција на победата“,

напиша Зеленски на Твитер.

I thank @POTUS and all of America for their leadership in rallying the world in support of freedom and for their vital assistance to Ukraine. Together we are heading towards a common victory, and we must ensure it this year already! 2/2

— Володимир Зеленський (@ZelenskyyUa) February 21, 2023

Претходно денеска американскиот претседател Џо Бајден во своето обраќање од Варшава, во пресрет на годишнината од руската инвазија, порача дека Украина никогаш нема да биде победена од Русија.

Не само што по една година од војната Украина не е поразена туку, како што кажа Бајден, таа е сè уште независна и слободна – од Херсон па сè до Киев. Американскиот претседател додаде оти Украина никогаш нема да ја загуби поддршката од САД и НАТО и нагласи дека сојузниците стојат цврсто против руската агресија.

Меѓу другото, Бајден во своето обраќање од Варшава ги негираше тврдењата на рускиот претседател Владимир Путин оти Западот е виновен за почетокот на војната во Украина и дека САД и европските држави се обидуваат да ја контролираат или уништат Русија.