Украинскиот претседател најави дека поднел предлог-закон до парламентот со кој се предвидува дека 9 мај официјално ќе се слави како Ден на Европа во Украина, додека Денот на победата ќе се слави на 8 мај како „Ден на сеќавање и победа над нацизмот“. Русија, инаку, го одбележува Денот на победата во Втората светска војна на 9 мај
Руските сили ќе доживеат пораз исто како што беше поразена нацистичка Германија во Втората светска војна, порача украинскиот претседател Володимир Зеленски во обраќањето на социјалните мрежи на 8 мај.
„Заедно го уништивме злото, на ист начин како што сега заедно се бориме против слично зло“,
рече тој, алудирајќи на војната на Русија против Украина.
Зеленски ова го кажа притоа најавувајќи дека поднел предлог-закон до украинскиот парламент со кој се предвидува дека 9 мај официјално ќе се слави како Ден на Европа во Украина, додека Денот на победата да се слави на 8 мај како „Ден на сеќавање и победа над нацизмот“.
Инаку, Русија го одбележува Денот на победата во Втората светска војна на 9 мај.
Зеленски рече дека Украина, како и другите европски нации, ќе го усвои 9 мај како Ден на Европа, за прослава на мирот и единството во Европа.
„Заедно со цела слободна Европа, 9 Мај во Украина ќе го одбележиме како Ден на Европа, чиј темел треба да биде и ќе биде мирот. Ќе го одбележиме нашето историско единство – единството на сите Европејци кои го уништија нацизмот и ќе го уништат рашизмот (термин што украинската влада го користи за да означи руски фашизам)“,
рече Зеленски.
Извор: 360stepeni.mk
