Зеленски патува во Јапонија на самитот на Г7

Посетата на Зеленски ќе биде негова прва посета на Азија откако Москва го започна нападот врз Украина и доаѓа во време кога Киев продолжува да бара воена поддршка од своите западни партнери пред долгоочекуваната контраофанзива

Јапонското Министерство за надворешни работи вчера објави дека украинскиот претседател Володимир Зеленски ќе учествува виртуелно на самитот на Г7, откако претходно оваа година беше поканет од јапонскиот премиер Фумио Кишида, но сега Си-ен-ен објавува дека Зеленски лично ќе отпатува во Јапонија и ќе присуствува на самитот.

Војната во Украина е важна точка на агендата на тридневниот самит, а се очекува лидерите да дадат силна изјава за единство за поддршка на Украина и да објават нови мерки против Русија.

Посетата на Зеленски ќе биде негова прва посета на Азија откако Москва го започна нападот врз Украина и доаѓа во време кога Киев продолжува да бара воена поддршка од своите западни партнери пред долгоочекуваната контраофанзива.

Очекуваното патување на Зеленски во Азија следи по европската турнеја во четири земји, каде што тој ги поздрави дополнителните ветувања за воена поддршка за одбраната на Киев.

Лидерите на Г7 на самитот на Г7, кој оваа недела се одржува во Јапонија, на кој доаѓа и американскиот претседател Џо Бајден, ќе покажат унифициран однос кон Кина заснован на заеднички вредности, признавајќи, сепак, дека секоја од овие земји ги одредува сопствените односи со Пекинг, изјави висок американски функционер.

За време на неговата посета на Јапонија, Бајден ќе покаже дека Вашингтон ја поддржува Украина и дека е поангажиран од кога било во Индопацифичкиот регион, изјави претставникот за Ројтерс кој сакаше да остане анонимен. По тридневниот самит што започнува во петок, Бајден накратко ќе ја посети Папуа Нова Гвинеја, а потоа ќе отпатува за Австралија на состанок на групата позната како Квад (Австралија, Индија, Јапонија и САД).