Кинескиот претседател не разговарал со Зеленски од почетокот на руската инвазија на Украина, но Пекинг минатиот месец објави план од 12 точки кој нуди политичко решение на украинската криза
Украинскиот претседател Володимир Зеленски го покани својот кинески колега Си Ѓинпинг да ја посети Украина, објави денеска новинската агенција Асошиејтед прес (АП).
„Подготвени сме да го видиме овде“,
изјави Зеленски во интервју за новинската агенција.
Кинескиот претседател не разговарал со Зеленски од почетокот на руската инвазија на Украина, но Пекинг минатиот месец објави план од 12 точки кој нуди политичко решение на украинската криза.
Ѓинпинг минатата недела престојуваше во тридневна официјална посета на Москва каде што разговараше и потпиша неколку договори со рускиот претседател Владимир Путин. Сепак, разговорите не покажаа напредок околу прашањето за ставање крај на војната во Украина.
Путин по средбата со кинескиот колега изјави дека мировниот план што го нуди Пекинг може да се искористи како основа за ставање крај на војната, но тој е изводлив единствено кога за тоа ќе бидат подготвени Западот и Киев.
Планот на Кина не бара експлицитно Русија да ја напушти Украина, туку повикува на мировни преговори и почитување на националниот суверенитет, без конкретни предлози.
Соединетите Американски Држави (САД) го отфрлија предлогот имајќи предвид дека Кина одби да ја осуди Русија за нејзината инвазија на Украина.
САД велат дека прекинот на огнот во овој момент ќе ги зацврсти руските територијални придобивки и ќе ѝ даде на руската војска повеќе време да се прегрупира.
Украина го поздрави дипломатскиот ангажман на Кина, но Зеленски рече дека ќе ги разгледа мировните решенија само откако руските трупи ќе ја напуштат украинската територија.
Извор: 360stepeni.mk
